مش عشان انا بنت...........................

دايما بترتبط كلمة بنت بالانوثة والرقة ومشهد البنت اللى خدودها بتحمر وبتقول اللى تشوفه يا بابا بس انا اكتشفت ان اننا فاهمين البنت غلط
 مش عشان انا بنت لازم اكون بحب اللون البمبى
مش عشان انا بنت لازم اقول حاضر ونعم وخلاص
مش عشان انا بنت لازم اقول مش فهمت ومش عملت عادى ممكن اقول مافهمتش وماعملتش
مش عشان انا بنت لازم اقول ميرسى عادى ممكن اقول شكرا
مش عشان انا بنت لازم ابتسمتى تبقى كده :) عادى ممكن تبقى كده :D
مش عشان انا بنت لازم لما اتكسف  خدودى تحمر
مش عشان انا بنت لازم اشرب من شفاطة ولا مؤاخذة
مش عشان انا بنت لازم اكون باكل بتراطيف صوابعى
مش عشان انا بنت لازم ابقى حاطة مونيكير ومربية ضوافرى
مش عشان انا بنت لازم لما ماافهمش حاجة اسكت وخلاص
مش عشان انا بنت لازم لما ارد على التليفون اقول الو واخنف
مش عشان انا بنت لازم انزل صور لمهند ونور ومسلسلات تركى
مش عشان انا بنت لازم اكون مابتفرجش على افلام رعب
مش عشان انا بنت لازم يبقى دلعى سوسو او فوفو او نونو
مش عشان انا بنت لازم لما اجى اسلم على حد تحس انى هتشل كده
مش عشان انا ابنت لازم اقول ياختشى كميلة و حسل و يا خلاسى
مش عشان انا بنت لازم اشيل الشنطة على طرف  ايدى وافضل رافعة ايدى طول ما انا ماشية
مش عشان انا بنت لازم ابقى بسمع اغانى تامورا
مش عشان انا بنت لازمبخاف من القطط والصراصير
مش عشان انا بنت لازم اكون مابحبش الكورة ومابلعبش بلاى ستاشين
مش عشان انا بنت لازم البس 50 طرحة الوان الطيف كلها
مش عشان انا بنت لازم كل لما اضحك احط ايدى على بؤى
مش عشان انا بنت لازم انى ابقى تافهة وماليش اهتمامات
مش عشان انا بنت لازم تتوقع انى هعمل الحاجات دى كلها
ممكن فعلا يكون بنات بتعمل الحاجات دى كلها بس لما تكون هى فعلا كده مش بتصطنع حاجة هى مش عليها
عشان انا بنت عشان مش هسمح لحد يخلينى ابقى حاجة انا مش عليها عشان انا كده
من الاخر
ما تخليش حد يحكم عليك ويحطك فخانة مش بتاعتك خليك انت ماتعملش حاجة هى مش فيك عشان ترضى حد
" it's better to be hatted for who you are than to be loved for who you are not "
خليك دايما عارف ان احلى حاجة فيك هى ان انت انت مش حد تانى :))

القمة !!

ما هى القمة ؟ القمة يا سادة و بدون تعقيد هى اعلى حاجة فى اى حاجة .جيت يوم و فكرت هو انا وصلت للقمة ؟ يعنى عملت حاجة قبل كده محدش عمل زى فيها ؟ لقيت ان معظم احاسيسى عادية عمرها ما وصلت للقمة ولا عمرها وصلت للقاع يعنى مثلا قمة الفرح حاجات كتير :لما تحس انك مبسوط من غير سبب لما توصل لحاجة كان كتير عايزها او حتى حاجة جت فبالك حالا و عملتها صح  او لما تقعد تجرب حل مسئلة وقبل خلاص ما تياس تلاقيك عرفت الحل .قمة الحزن لما تفقد شخص عزيز عليك او تتصدم فى حد. قمة الوجع لما تحس انك مش قادر تعمل حاجة لما حاجة تحصل و عمرها ما هترجع بتحس بوجع غريب كده فقلبك قمة الملل :لما تبقى مش بتحس  بحاجة بجد كلو عادى اما قمة القهر :لما تحس انك مظلموم وتبقى مظلوم ومالكش الحق تتكلم وكمان بقيت انت المدان قمة الابتسام :لما حد يفكرك بفيلم كرتون قديم او اغنية او لعبة قديمة قمة الهبل :لما تعد تضحك مع صحابك على كلام او جمل هبلة كنتوا بتقولها وانتو صغيرين مثلا زى بيبراشن اللى هو فيبراشن يعنى وكلام كتير.... :D جيت اشوف كده لقيت ان انا صحيح حسيت بالحاجات دى بس ما وصلتش للقمة جيت ابص اكتر لقيت ان تقريبا كل المصريين كده (يكادوا)... عمرنا ما بنوصل لقمة حاجة دايما نكاد .نكاد نفرح حتى الحزن نكاد نحزن من كتر زحمة الحياة دى ماعناش بنعمل حاجة بجد  بنستهون بمشاعرنا وفيها ايه?   عادى بقينا عادى . عشان كده قررت انى هعمل كل حاجة كل يوم كانى هموت فى اخره ف هتمنى اخر يوم ليا ازاى و هتمنى اخر فكرة الناس تفتكرنى بيها ايه ?
مع ان الموضوع صعب بس اهو بحاول.اكاد اوصل للمحاولة عشان حتى مش عارفه احاول بجد :p :D

عقبالك ؟؟

عقبالك والله انتى بتتكلمى بجد !!! اغرب موقف تتحط فيه البنت لما تقابل واحدة صحبتها و تقولك عقبالك و خصوصا لو زى ما حصل معايا انا حسيت كده انها بتكلم حد تانى او ان فى حاجة غلط او ده اخوها مثلا وبتهز ولا ايه يعنى هى فى تانيه ثانوى و بتقولى عقبالك ! يعنى هى اختارت الانسان ده ازاى ؟ عملها كومنت حلو مثلا ولا كان بيلعب كورة قدامها فى الشارع ولا ايه بس يعنى انا وانا فى الموقف ده المفروض اقولها يا رب ولا اسالها اذا كان ليه اخوات واصحاب مثلا
كان كده حد كب عليك مياه ساقعة فى عز التلج و كل اللى عملتو انى هزيت راسى وابتسمت وقلت لنفسى لا حول ولا قوة الا بالله واحلى حاجة ان نفس الكومنت بيتقال بعدها  "هىى هى هى هى هى على كده بقى احنا عنسنا " ويا سلام لو واحدة اكبر منها و احلى حاجة لما قامت عملالى اديها كده وبتقولى خطيبى ؟؟؟؟؟؟؟؟؟؟ خطيبك ايه انا مش فاهمة والله حسيت زى ما اكون بتفرج على هند صبرى ف عايزة اتجوز وبتقول يا بنات يا بنات باركولى انا اتخطبت ههههههههههههههه و بتقولى خطيبى خطيبك ايه يا ماما دا انتى عيلة و فرحانة كده كانها كده بتغيظك يعنى من الاخر كده كان احساس غريب انا مش عارفة اوصفه احراج او شعور بالغرابة كده او كانك بتتخيلى نفسك عيلة بضفرتين "اللى عمرنا مل عملناهم دول " بس بتتخيلى نفسك وانتى طفلة وكنت عايزة اقول يع يصراحة
اول مرة الواحد يبقى مبسوط وهو بيقول انا لسه عيلة اصلا :))